گئجه یاری‌سی‌دیر؛ فوتبول دالغاسی(موج فوتبال) وئرلیشینده، فوتبول فئدراسیونون هیأت رئیسه سئچیمی، و اورا “اوستان” نوماینده‌لرینین یول تاپماسی‌نین گركلی اولدوغوندان دانیشیرلار. آما بئله دانیشیردیلار، سانكی بورالاردا آزربایجان كی هئچ، كانادا دان توت آلاسكایا یئرلشیب! “آزربایجان” یئرینه او قدر “شومالیغرب” دئدیلر، منه ائله گلدی كی بوندان سونرا تیراختورو آلقیشلایاندا، “یاشاسین آزربایجان” یئرینه، “یاشاسین شومالیغرب” دئیه‌ك!!
تیلویزیونون انگین باسیب، اوزانیرام یاتام. بئله باشیمیزی قاتمیشیق تیراختورون سونوجلاری، و حتی بیر ایكی دنه اویونچونون آلت‌دان گئیدیكلری گؤی گؤینكلره(!)، آز قالیر تیراختورون بیر كولوب دان اوستون اولماق نه‌ده‌نینی اونوداق!
یارین قیش سونونون ایكینجی گونو، فئوریه‌نین 21جی گونو، دونیالیق آنادیلی گونو، و بو مملكت‌ده آنادیلی عمد ایله اونودولان گوندور! یونئسكونون گئنل آپاریجی‌سی ایرینا بوكووا، 2012 جی ایلی‌نین آنادیلی گونونه وئردیگی ساوینین باشیندا، نئلسون ماندئلانین بو گؤزل سؤزونو یازمیشدیر:
Nelson Mandela once said that “If you talk to a man in a language he understands, that goes to his head. If you talk to him in his language, that goes to his heart”. (un.org)
توركجه‌سی اولار: “بیر اینسان ایله، بیلدیگی دیلینده دانیشسان، سؤز اونون باشینا گئدر. اونون اؤز دیلینده دانیشسان، اونون اورگینه گئچر“. آزربایجانلیلارین نه‌دن تیراختوردان سونرا باشقا تاخیملاری سئومه‌دیكلری، و تیراختورو سینیرسیز سئومكلری‌نین رمزی بودور. بیلمه‌یه‌نلری بیلسینلر.
اؤز وارلیقلاری و كیملیكلرینی قوروماغا بیرینجی اؤنم وئرنلره، بو گونو قوتلو اولسون دئییرم.
یاشاسین تیراختور، یاشاسین آزربایجان
آیدین كسائی