بیر نئچه گون اؤنجه "بای باك" سایتی گونی آذربایجان میللی آزادلیق جبهه سی (گاماج) باره سینده تخریب ائدیجی معلومات یایمیشدیر.
"بای باك" سایتینین تقدیم ائتدییی تصویرده گؤرونن جناب آذریار دانشور بو باره ده بیر یازی ایله چیخیش ادیب:
سئوگیلی وطنداشلار ، و دونیالار بده لی میللی دوشونجه لی باجی قارداشلاریم سلام!
هر شئیده ن اؤنجه سیزه جان ساغلیغی ووطنیمیزه اوغورلو گله جك دیله ییره م!
كیتابلاردا اوخودوق،معللیم لرده ن اؤیرندیك ، فیلم لرده گؤردوك، تاریخی آراشدیردیق ، حیاتی سینادیق و روحوموزو دینله دیك. لاپ ظلمتین زیل قارا یئر لرینده ده ایشیق نوطفه لرینین بسلنمه یینی ، اینسانین ایلیگینده اولان آزادلیق دیله یینی ، و قارا گئجه لرده اولان سحر اومیدینی دویدوق ! بیز هانسی ساده حاققیمیزی دیله دیك و اینسانین روحونو آشاغی لایان هانسی بوروشوق جاوابلارا راسلادیق! هامیمیزا آچیق آشكارا بللی اولدو! كیمسه نین بیزه دوغماروحوموزدان باشقا حق قائیل اولمایاجاغینی دا باشا دوشدوك بیز!
بیزمدنیّت دئیه دئیه سئومه یه چالیشدیق هركسی، سئودیك، باشقالارینا سئودیردیك آما سئویلمه دیك ، چونكی بیز اونلارین چوخدان بوغازلاریندان سوروشوب اؤج قارینلاریندا قالانمیش حاققیمیزی ایسته ییردیك ! شنگول منگولوسونو آناسی ایسته ین كیمی! آما بیز اونلارین نه قارینلارینی سؤكدوك ونه سؤكمك ایسته دیك! چونكی بیزمدنیّتین كؤكونده ن سود امیب بؤیویه ن میللتیك!
بوگون "بای بك" آدی ایله فعالیت گؤسته رن سایت دا گؤردویوم بیر یازی و اوچ شكیل قارشیمیزدا اولان سیستم قوللارینین نه قده ر غیرمدنی و غیر اینسانی دوشونجه یه صاحیب اولدوغونو بیرداها فیكریمده وورغولادی! آما بو مسئله بو مكتوبون یازماسینا سبب اولمادی. بونا اصیل سبب اولان "بای بك" سایتینین اؤز ماهیّتی و اونون بعضی باجی قارداشلاریمیزا آیدین اولماماسی ایدی.
تاریخ بویو آذربایجانین بوتون مبارزه میدانلاریندا بیزیم قهرمان روحلو میللتیمیزین سارسیلماز اؤزه للیگینه قارشی، حیله كار و آلدادیجی سیلاحلار قوللانیلدی ، بئله جه آرامیزا نیفاق توخومو سپیلدی وآچیلان بیر یومروغون بارماقلاری كیمی، قارداش قارداشدان آیری دوشدو، آتدیقیمیز آددیملار اؤزگه لرین خئیرینه قورتولدو و بیز اودوزدوق اومیدیمیزی ، طالعیمیزی !چونكی ایناندیق هر كسی ! سونرالار بوتون حركتلریمیزده گئنه همین آش اولدو همین كاسا ، چونكی بیز اونلارین حیله كارلیقلارین اونوتدوق آما اونلار بیزیم ساده لیگیمیزی اونوتمادیلار!
سایت لاردا هر كسه آیدین اولدوغو كیمی گونئی آذربایجان دا اطلاعات طرفینده ن توتوقلانان غئیرتلی میللی فعاللاریمیزین ایچینده منیم ان یاخین دوستوم اولان مجید سفیدانی و ناصر كاظم پور دا وار . آرتیرمالییام ناصر كاظم پور بیر مدت اؤنجه تبریز زیندانینا كؤچورولوب و مجید سفیدانی هله ده اطلاعاتین تك آداملیق حبس خاناسیندا ساخلانیلیر،اونلارین هانسی جرمه توتولدوقلاری هله بللی دئییل آما "بای بك "سایتیندا بو باشلیقلا (احمد اوبالی و گاماج قورومونون توپلانتی‌لاری ایران اطلاعات مامورلاری‌نین كونترولوندا! ) قویولان خبر و شكیلده دیققتینیزی چكمك ایسته دیگیم بیر قونو وار، اوردا یازیب كی(نئچه ایلدیر كی باكی، ایستانبول، آنكارا و آمئریكانین ایكی شهرینده سؤزده گیزلی توپلانتی‌لار كئچیرن احمد اوبالی و اونون باشقان‌لیق ائتدیگی گاماج قورومو توپلانتی‌لاری دئمه‌لی ایران گیزلی سئرویسی طرفین‌دن ایزلنیرمیش. یئنی یاییلان گؤرونتولرده احمد اوبالی و هالیهازیردا گوناز قوروموندا چالیشان بیر نئچه شخصین بیر اوتاقدا دانیشیق‌لاری گؤستریلیر. یازی ایله یاییلان گؤرونتولرده ایددئا اولونور كی توپلانتی ائوی اصلینده جناب اوبالی-نین باكی-دا گیزلی اولا‌راق گونئی‌لی‌لری آغیرلاییب ایشه آلدیغی یئردیر!) بیر حالدا كی او شكیللر مجید سفیدانینین اؤز موبایلی ایله اوشاقلارا چكدیردیگی فیلمین بیر كادری دیر و او گؤروش نؤوروز بایرامی مناسیبتینده اونلارین باكی یا سفر ائتدیكلرینده قورولوب. من او گؤرونتوده همیشه كی كیمی شعیر اوخویورام و مجید سفیدانی عادتی اولان كیمی منده ن فیلم چكدیریر! عئینی حالدا اوردا گؤرونه ن ائو اونلار اوچون بیر نئچه گونلوك منیم كیرالادیغیم ائو دیر باكی دا، احمد اوبالی بی منیم ایسته ییمله قوناقلاریمی گؤرمه یه گلیب و اوردا گئده ن سؤزلراو قده ر گونده مان دیر كی حتّی گوناز تی وی یه بئله مربوط اولمور، چونكی بو ساده بیر عائله وی گؤروشدور، قالسین كی گاماج تشكیلاتینا آیید اولسون !. اؤنجه بوكی گاماج بیر تشكیلات دیر، و بوتون گوجلو تشكیلاتلار كیمی، هئچ بیر زامان گیزلی اولان توپلانتی لاریندان فیلیم چكمه یه ایجازه وئریلمز. ایكینجی سی : مجید سفیدانی وناصر كاظم پور آذربایجان سئوه ن اینسان اولسالاردا او قده ر ساده اینسانلاردیلار كی تشكیلات نه دیر درك ائده بیلمزلر و فیلیم چكدیكلری و اونو موبایللاریندا ساخلادیقلاری بونو آیدینلادیر، اوچونجوسو: اطّلاعات اداره سینین طراحلاری اونلاردان الده ائتدیكلیری گؤرونتولری، بئله جه سرگی یه قویماقلا اوساده اینسانلارا ،اونلاری دوستاقدا ساخلایا بیله جك ، بیر مدرك و پرونده قازانماق و عئینی حالدا دا باشقا فعاللارا" بیز هر شئیده ن خبریمیز وار " دئمك ایسته ییر لر. مجید سفیدانی وناصر كاظم پور و عائله لری نؤوروز بایرامیندا باكی یا گلمیشدیلر آما خردادین 22 سینده توتولوبلار، بو اطلاعات اداره سینین سونرادان باشا دوشدویونو یا بیری لرینده ن خبر آلدیغینی گؤستریر، بئله جه آرتیرمالییام كی میللی فعاللارین و میللتیمیزین ایچینده قورخو و توهّم یاراتماق ایسته دیكلری، اونلارین مبارز ماهیّت لرینی كیرلندیرمك آماجلاری ، و وطن یولوندا چالیشان ده یرلی قارداشلاریمیزین آدلارینی پیسه چیخارتماق ایسته دیكلری ده اورتایا چیخیر! بیر حالدا كی فارس شوونیزمی اؤزونو اونودان هریئرینده ن دورانی قابا توتوب اؤزونه ضیالی وارلیق ساییب ، بیزیم حقیقی ضیالی لاریمیزی دا كیچیمسه ییب گؤزلرده ن سالیب ،شخصیّت لرینی ترور ائتمك ایسته ییر و بو تاریخیمیزین هر واراغیندا دائما دوشمانلاریمیزین تكرار اولان بیرشیوه سی دیر! سونوندا عزیز وطنداشلاریما و دونیالار بده لی اولان میللی دوشونجه لی مبارز باجی قارداشلاریما بو سوالی سونماقلا مكتوبومو باشا چاتدیریرام: بای بك سایتینین دئدیگی "1 سؤز" وئبلاگیندا ،گاماجدان و باشقا گؤرونتولرده ن هئچ نه یازیلماییب !" بای بك "سایتی بو سؤزلری نییه یازیب؟ آنجاق اطلاعات اداره سینین الینده اولان بو گؤرونتولری نئجه و كیمده ن آلیب ؟دوشمان یانا یازیسیندا هانسی هدفلر گیزله نیب و نه ائتمك ایسته ییر؟ یوخسا "بای بك" سایتی دا آغانین اؤز بالاسیدیر؟!...
آذریار دانشور