دئیه‌سن حاجی فتوللازاده‌نین‌ده قازاندیغی چؤرك حلال‌دیر
تیراختور-ایستیقلالین بازار گونو یاریشیندان سونراكی توز
تورپاق سانكی یاتماق ایسته‌میر! اویون آراجی(قاضی)سی‌نین تیكراری و عَمده اوخشار
یانلیشلیقلار و عدالتسیزلیكلری تاماشاچیلارین تپكی‌لری، و سونراكی حاشیه‌لره بیر
نه‌دن ایدیلر. ایش اورا چاتیب كی تیراختورون سس‌سیز باشقانی، سردار جعفری‌ده دیله
گلدی و شیددت ایله اعتراض ائتدی كی بو نه اویون‌دور چیخاردیرسینیز؟ استقلالی ایندی‌دن
قهرمان ائتمك قصدلری واردیر سانكی!
و بو تارتیشمالار یاواش یاواش تئهرانین باشقا تیمی، یانی پئرسپولیس-تیراختور و
پئرسپولیس-بلدیه آراسیندا اورتایا چیخان حادثه‌لره بنزه‌ییر. بو بنزه‌مه‌یی، هم
پئرسپولیسین و هم‌ده ایستیقلالدا آدلیم تورك آداملارین اولماسینا گؤره دئییرم. بو
بیر-ایكی ایل‌ده چوخ عجیب ایدی كی تیراختورون موتورو قیزیشاندان سونرا آدلیم تورك
فوتبول آداملاری، فوتبول‌دان قوولموش اولاراق، بیردن بیره تئهرانین قیرمیز و گؤی
تیم‌لرینده اصلی نقشه صاحیب اولدولار! دایی‌نی ایرانین میللی تیمیندن
چیخاتمیشدیلار و خوی‌لو حاجی فتوللازاده ده چوخ‌دان ایدی ایستیقلالین قاپی‌سینا
یاخینلاشابیلمیردی! آما ایلك‌ده دایی باغیشلاندی و پئرسپولیسین باش مورببی‌سی
سئچیلندن نئچه آی سونرا، حاجی فتوللازاده ده ایستیقلالین باش سوروملوسو اولدو.
دایی و تیراختور یانداشلاری‌نین آراسیندا گئچمیش سوره‌ج‌دن هامی‌میزین خبریمیز
واردیر. تبریزه ایلك دؤنه گئده‌نده آلقیشلاندی، آما گئت‌گئده یئرسیز دانیشیقلاری
و یانلیش داورانیشلارینا گؤره هویلاندی! حاجی فتوللازاده‌نین گؤزلری آلتیندا
اداره اولونان ایستیقلالدا تبریزه گئدنده ایلك‌ده آلقیشلاندی؛ چونكو هم حاجی
فتوللازاده تورك ایدی و هم ایستیقلالین مورببی‌سی یانی مظلومی جاوانلیقدا
تیراختوروچون اوینایاردی. دوزدور اویونون سونوجونو آراجی ده‌ییشدی، آما
تاماشاچیلار تكجه فئدراسیونون علئیهینه شوعار وئردیلر، و بیر داها ایستیقلاین
مورببی‌سی‌نی آلقیشلادیلار. آنجاق اویوندان سونرا كی دانیشیقلار یاواش یاواش هر نه‌یی
ترسینه ائتمه‌یی آدامی قورخودور. تیراختورون مورببی و سوروملولاری آیدین
یانلیشلیقلاری آچیقلاییب، اعتراض ائتمه‌یه حاقلی اولسالاردا، ایستیقلالین
دولاندیرانلارین یئرسیز دیفاع ائتمكلری هئچ، اؤزلرینی تبریزده مظلوم اولماقلاریندان
دانیشماق چوخ گولونج‌دور. ساده‌جه دئسه‌لر بیز واللاه تقصیرسیزیك، و هر نه داورین
بوینونا دیر آدام یانماز. آما قاباق‌دان گلمیشلیك ائدیب دئییرلر آراجی گرك
تیراختورون فیلان اویونچولارین ایخراج ائدیب و پئنالتی‌لاری‌نی توتمایاردی.
البته تكجه تیراختور یانداشلاری دئمیرلر بیزیم قولوموزو داور حیسابا قویمادی.
یاریشدان سونرا كی گون، فوتبول3 سایتیندا كی سئچگین گونده‌لیكلر تیراختورون حاققی
پوزولماق‌دان دانیشیردیلار(تكجه ایستیقلالین رسمی گونده‌لیگیندن سونرا). البته
اونلار تیراختورون آلا گؤزلرینه عاشیق دئییل‌دیلر و بیر بهانه تاپمیشدیلار
پئرسپولیس‌دن دیفاع ائتمه‌یه گؤره! ایكی هفته بوندان اؤنجه‌ده گون نم هاردان
چیخمیشدی، پئرسپولیسین ایستیقلالا ووردوغو قول حیساب اولونمادی و اونلار آللاه
آللاه ائدیردیلر تیراختورون كیمی چوخلو یانداشلی تیمینده اوخشار حال‌دا حاققی
پوزولسون.
ایكی گئجه بوندان اؤنجه دوخسان وئرلیشین داورلیق اوزمانی تیراختورون بیر قولو یوخ،
بلكه بیر باشقا آفساید تانینمیش قولونون دوزگون اولماغینی اونایلادی(تایید ائله‌دی).
سونرا حاجی فتوللازاده‌یه دانیشماق نووبه‌سی یئتیشه‌نده، دوردو باشلادی كی یوخ اصل‌ده
بیز گرك اعتراض ائدك؛ فیلان صحنه‌نی نه‌دن گؤسته‌رمه‌دیز؟ دانیشیقلاریندا تعاروف
ایچین دئییر تیراختور دا اؤزوموزنكودور و منیم همشهری‌لریمین تیمی‌دیر؛ من اؤزوم
تیراختورا چوخلو یاردیم ائتمیشه‌م و بیز لاپ سئوینه‌ردیك تیراختور اوتسایدی! آما
سؤزون آردیندا بئله تیراختورا سالدیریر آدام قالیر معطل! آدام دئییر هر كیمسه حاجی
فتوللازاده‌نین یئرینه اولسایدی، دئیه‌ردی بابا حاق سیزینله‌دیر. یانلیش‌دی اولوب
گئچیب‌دا! آما اصل‌ده پئرسپولیس‌دن دیفاع ائتمك ایچین بو دؤنه تیراختورون یانداشی
اولان فئردوسی‌پور، آخیر دا اوز دن گئتدی و حاجی دئیه‌ن صحنه‌نی ائكرانا گتیردی.
دایی تیراختورون علئیهنه دانیشاندا، موغالیطه ایچین بیر سؤزو چوخ دئییردی.
دئییردی كی "منیم چیخارتدیغیم چؤرك حلال اولمالی‌دیر"! آما حاجی
فتوللازاده علی دایی‌یا گؤره سیاستلی و منطیقلی داورانیر. دئیه‌سن حاجی فتوللازاده
ایسه بونو دئمك ایسته‌ییر. بیری‌سی اونا دئسین سن كی آراجی یاردیمی ایله آز
قالدین اوتاسان و سون‌دا دا موساوی سونوجو آلیب تبریزدن اكیلدینیز!! دای نه‌یه
دامین او باشیندان دوشورسن!؟ بللی دئییل آزربایجانا آز قوللوق ائتمیش توركلر، بئله
چاغلار نه‌یه حلال قازانماقلارینی بیلدیرمك ایسته‌ییرلر؟!
منجه بیز نه چكیریك، بیرینجی‌سی خالقیمیزین بؤیوك بؤلومو
آنادیلینده ساوادسیزلیغیندان، و ایكینجی‌ده ساوادلی‌لاریندا بو دیلی بیلیمسل باشقالارا
اؤیره‌تمه‌مك و اینتئرنئتده بیلگی یایماماغی، و اوچونجو ده اؤزگه‌نین ییرتیجی
شكیل‌ده هر نه یی اؤز آدینا یئیه‌لیك ائتمه‌سی‌دیر.
اینتئرنئتده دولانیردیم بیر بیلاق‌لا قارشیلاشدیم. اؤزونو تئهران‌دا دوغولموش
بیلاق یازان، آدینی Sunaz
یازمیشدی. دئدیم حتمن بیلمیر بونو Sanaz شكلینده یازمالی‌دیر و ایسته‌دیم اونو
امر به معروف و نهی از مونكر ائدم! سونرا بیلدیم او هئچ تورك
دیلی بیلمیر سانكی، و اؤز ساناز آدینین توركجه اولماغیندان‌دان خبری یوخدور هئچ،
بلكه هئچ بو باغلاردا دئییل و sun یازماق‌دان دا منظوری اینگیلیزجه "گونش"دیر! دئدیم قوی
باخیم گؤروم هله اینتئرنئتده ساناز آدینا گؤره نئجه فیكیرلر واردیر.
فارسجا ویكی‌پئدیانی گؤردوم بؤیوك سس ایله گولدوم. یازیب ساناز فارسجا آددیر.
معناسی دا یانی بی‌نظیر و تایی آز! "بی‌نظیر" دئدیگی حال‌دا دا سؤزجویو
بولوب "سا" و "ناز"ا! "سا"یا كی هئچ زاد یازماییب ،
آما نازین فارسجا اولدوغونو وورغولاییب! فیكریم قاتیشدی! گؤردوم سولمازی‌‌دا بیر
بوجاق‌دا قویوب! قورخا قورخا او صحیفه‌یه ده باش ووردوم. سولمازی نه قدر
چالیشمیشدی فارسجا ائده بیلمه‌میشدیلر. آما یازمیشدی دئمك‌ده اولماز سولماز
كسینلیكله توركجه‌دیر، چونكو به‌تر بو آدلارا بنزه‌ییر: ائلنار، گولناز، مهناز،
فرناز و ... كیمی آدلار!!!
ویكی‌پئدیا‌دا سانازین اینگیلیزجه صحیفه‌سی ده وار ایدی، آما گؤردوم اوردا دا ایلك‌ده یازیب بو آد
فارسجادیر؛ و سونرا یازیب ساناز خالق سئون بیر توركجه آد دیر و "سان(San)" و "آز(Az)"ین
بیر بیرلرینه قوشولماغینی آچیقلاییب. نئچه دنه ده اینگلیزجه سایت گؤردوم سانازی
فارسجا بیلدیرمیشدیلر. باغلانتی وئرمیرم ان آزی بورا ایچین قایناق اولماسینلار!
یئرینه بورایا بیر كلیك وورون آللاه سیزه‌ده، هم یازارینا دا بركت وئرسین: "معنی نامهای تركی".
یوخاری‌دا كی سؤزلر ایله بونو دا دئمك ایسته‌ییردیم كی تورك دیلینه گؤره ایران‌دا
چوخ آز بیلگی‌یاییلماق و باشقا طرف‌دن كسینلیكله عمدی یانلیشلاری ویكی‌پئدیا كیمی
سایتلارا سوخوشدورولماسینا گؤره، بیزیم دوزگون سؤزلریمیزه ده هئچ كیمسه اینانمیر و
حتی اوسته‌له‌ییب سؤزلریمیزه گولورلر. بئله بیر اولایین قارشی‌سینی آلماق ایچین
بوتون یولداشلار قوللارین چیرمالامالی‌دیرلار. ایش چوخدور و ال چوخ اولمایاندا
سؤزو ده یئریتمك اولمور. ساناز اولمایاق!