تبریز
چوخ زامان كدرلی گؤرموشم سنی،
یادیندا وارمیدیر او حالین، تبریز؟!
ایندی او گونلردن اوزاقسان داها،
آرتیبدیر شؤوكتین، جلالین، تبریز!
بیر قودرت دویورام دوغما سسیندن،
سینمی قیزدیردین گور نفه‌سیندن.
حیات كیتابی‌نین صحیفه‌سیندن
سیلینیب حسرتین، ملالین، تبریز!
او گون كی، سینه‌نی سیپر ائیله‌دین،
قارانلیق گئجه‌نی سحر ائیله‌دین،
بیزه آزادلیغی خبر ائیله‌دین
سسینه سس وئردی ماهالین، تبریز!
من چوخدان وئرمیشم سنه قلبیمی،
ایسته‌سن آل بیر ده سینا قلبیمی،
قویما یاد اللرده سینا قلبیمی،
داها قاییتماسین زاوالین، تبریز!
بیزده مقدسدیر آنانین آدی،
شاهلار، حؤكمودارلار بونو قانمادی.
هر ایل اوردو چكیب سنی تالادی،
آرتدی دردین، قمین، خیالین، تبریز!
اگر آتیلسا دا اودلارا یوردوم،
آنجاق اییلمه‌دی یادلارا یوردوم.
دؤزدو هر چتینه، هر دارا یوردوم.
یاردی قارانلیغی هیلالین، تبریز!
اوشاقكن دئدیلر آذر آناندیر،
اودلاردان دوغدوغوم ائله ایاندیر.
بیزه بؤهتان آتان یازینی قاندیر،
جاوابسیز قالماییب سوالین، تبریز!
بو ائللر یانیندا آند ایچیرم من،
خالقین آرزوسودور قلبیمدن كئچن.
من ایلهام آلمیشام هر زامان سندن،
دونیالار قدردیر كمالین، تبریز!
