حسینه یئرلر آغلار گؤیلر آغلار
بتول و مصطفی پیغمبر آغلار
حسینین نوحه سین دلریش یازاندا
مسلمان سهل دیر كی كافر آغلار
كور اولموش گؤزلرین قان توتدو شیمرین
كی گؤرسین اؤز الینده خنجر آغلار
حسینین كؤینه گی زهرا الینده
چكر قیحا قیامت ، محشر آغلار
آتاندا حرمله ، اوخ كربلاده
گؤریدین دوشمن آغلار ، لشكر آغلار
قوجاغیندا ، گؤردین ام لیلا
آلیب نعش علیّ اكبر آغلار
رباب ، نیسگیل دؤشونده سود گؤرنده
علیّ اصغری یاد ائیلر آغلار
باشیندا كاكل اكبر هواسی
یئل آغلار ، سنبل آغلار ، عنبر آغلار
یازاندا آل طاها نوحه سین من
قلم گؤردوم سیزیلدار ، دفتر آغلار
علی ، شق القمر ، محراب تیلیت قان
قولاق وئر ، مسجید اوخشار منبر آغلار
علی دن شهریار ، سن بیر اشاره
قوجاقلار قبری ، مالك اشتر آغلار
(اوستاد شهریار)
